آزاد کشمیر کے مختلف سیاسی رہنماؤں اور کاروباری شخصیات نے مولانا فضل الرحمان کے پاک فوج سے متعلق بیان پر ردعمل دیتے ہوئے اس کی مذمت کی ہے۔ رہنماؤں کا کہنا ہے کہ قومی قیادت کو ایسی گفتگو سے گریز کرنا چاہیے جس سے عوام کے جذبات مجروح ہوں۔
پاکستان تحریک انصاف کے رہنما چوہدری محمد آصف نے کہا کہ پاک فوج ملک کے دفاع کی ضامن ہے اور سرحدوں کی حفاظت کے لیے دن رات خدمات انجام دینے والے جوانوں کی قربانیاں قابل فخر ہیں۔
پاکستان مسلم لیگ (ن) کے رہنما چوہدری رخسار نے اپنے ردعمل میں کہا کہ پاک فوج کے خلاف بیان پاکستانیوں اور کشمیریوں کے جذبات کو ٹھیس پہنچانے کے مترادف ہے۔ انہوں نے مولانا فضل الرحمان سے مطالبہ کیا کہ وہ اپنا بیان واپس لیں۔
پاکستان پیپلز پارٹی کے رہنما چوہدری شعیب ارشد نے بھی بیان پر افسوس کا اظہار کرتے ہوئے اس کی مذمت کی۔ ان کا کہنا تھا کہ گزشتہ سال بھارت کی جانب سے دراندازی کی کوشش کا پاک فوج نے بھرپور جواب دیا تھا۔
استحکام پاکستان پارٹی آزاد جموں و کشمیر کے رہنما محمد علی شان سونی نے کہا کہ قومی سلامتی کے اداروں اور پاک فوج کے خلاف گفتگو قابل مذمت ہے۔ ان کے مطابق قومی رہنماؤں کو ایسی باتوں سے اجتناب کرنا چاہیے جن سے پوری قوم کے جذبات کو ٹھیس پہنچے۔
چیئرمین ڈسٹرکٹ کونسل میرپور راجہ نوید اختر نے کہا کہ پاک فوج کی بدولت پاکستان اور آزاد کشمیر کی سرحدیں محفوظ ہیں۔ انہوں نے پاک فوج کے فیصلوں اور کردار کو سراہتے ہوئے مولانا فضل الرحمان کے بیان پر تنقید کی۔
میرپور چیمبر آف کامرس اینڈ انڈسٹری کے صدر عمر جرال نے بھی قومی سلامتی کے اداروں کے خلاف بیان بازی پر اعتراض کرتے ہوئے کہا کہ پاک فوج کے اہلکار سرحدوں پر ملک کے تحفظ کے لیے اپنی ذمہ داریاں نبھا رہے ہیں اور ان کی خدمات قابل تحسین ہیں۔
About the Author
