ایران نے امریکا سے مذاکرات کی خبروں کی تردید کر دی

تہران: ایران نے واضح کیا ہے کہ اس وقت امریکا کے ساتھ کسی قسم کے مذاکرات نہیں ہو رہے، جبکہ عمان کے ساتھ رابطے صرف آبنائے ہرمز میں بحری آمدورفت اور انتظامی امور تک محدود ہیں۔

ایرانی وزارت خارجہ کے ترجمان اسماعیل بقائی نے ہفتہ وار پریس بریفنگ میں کہا کہ ایران اور امریکا کے درمیان کسی بھی سطح پر بات چیت جاری نہیں ہے۔ ان کا کہنا تھا کہ بعض میڈیا رپورٹس میں مذاکرات کی خبریں سامنے آئی ہیں، لیکن ان میں کوئی حقیقت نہیں۔

ترجمان کے مطابق اس وقت ایران کی مشاورت صرف عمان کے ساتھ جاری ہے، جس کا مقصد آبنائے ہرمز میں محفوظ بحری نقل و حرکت کو یقینی بنانا اور اس اہم سمندری راستے سے متعلق انتظامی معاملات پر تعاون کو فروغ دینا ہے۔

انہوں نے کہا کہ آبنائے ہرمز عالمی تجارت اور توانائی کی ترسیل کے لیے انتہائی اہم گزرگاہ ہے، اسی وجہ سے اس سے متعلق علاقائی سطح پر مسلسل رابطے اور مشاورت ضروری ہیں۔

ایران کا یہ مؤقف ایسے وقت میں سامنے آیا ہے جب حالیہ دنوں میں بین الاقوامی میڈیا میں تہران اور واشنگٹن کے درمیان ممکنہ سفارتی رابطوں اور مذاکرات سے متعلق مختلف قیاس آرائیاں گردش کر رہی تھیں۔

سیاسی تجزیہ کاروں کے مطابق ایران کے تازہ بیان سے ظاہر ہوتا ہے کہ تہران فی الحال امریکا کے ساتھ براہِ راست مذاکرات کے بجائے خطے میں تعاون اور آبنائے ہرمز سے متعلق معاملات پر توجہ مرکوز کیے ہوئے ہے۔

ماہرین کا کہنا ہے کہ مستقبل میں ایران اور امریکا کے تعلقات کی سمت کا انحصار خطے کی سکیورٹی صورتحال، سفارتی پیش رفت اور دونوں ممالک کی پالیسیوں پر ہوگا۔