لارڈز ٹیسٹ میں شکست، پی سی بی کا قومی ٹیم میں مزید سخت فیصلوں پر غور
لاہور: لارڈز ٹیسٹ میں پاکستان ٹیم کی شکست کے بعد پاکستان کرکٹ بورڈ (پی سی بی) کے چیئرمین محسن نقوی نے قومی ٹیم کی کارکردگی کا جائزہ لیتے ہوئے آئندہ چند روز میں مزید سخت فیصلوں کے حوالے سے مشاورت شروع کردی ہے۔
ذرائع کے مطابق چیئرمین پی سی بی قومی ٹیم کے سینئر اور تجربہ کار کھلاڑیوں کی حالیہ کارکردگی سے سخت مایوس ہیں۔ انہوں نے سلیکشن کمیٹی کو ہدایت کی ہے کہ ناکام رہنے والے تجربہ کار کھلاڑیوں کو بار بار مواقع دینے کی پالیسی پر نظرثانی کی جائے۔
ذرائع کا کہنا ہے کہ محسن نقوی نوجوان اور جونیئر کھلاڑیوں کو قومی ٹیم میں آگے لانے کے خواہاں ہیں تاکہ مستقبل کے لیے ایک مضبوط اور متبادل ٹیم تیار کی جاسکے۔
اس حوالے سے چیئرمین پی سی بی نے مستقبل میں انڈر 19 اور دیگر جونیئر سطح کے باصلاحیت کرکٹرز کو زیادہ سے زیادہ مواقع دینے اور انہیں مکمل اعتماد فراہم کرنے کی پالیسی اپنانے کی ہدایت کی ہے۔
دورہ انگلینڈ میں پاکستان ٹیسٹ ٹیم کو مسلسل دو ٹیسٹ میچز میں شکست کے بعد ٹیم اور مینجمنٹ میں تبدیلیوں کا سلسلہ شروع ہوگیا ہے۔ اس صورتحال کے باعث قومی ٹیم کے کھلاڑیوں میں بھی بے چینی پائی جا رہی ہے۔
پاکستان کرکٹ بورڈ نے دورہ انگلینڈ کے دوران بڑا فیصلہ کرتے ہوئے محمد رضوان، امام الحق، سلمان علی آغا، عامر جمال، علی عثمان، اویس ظفر اور خرم شہزاد سمیت 7 کھلاڑیوں کو ٹیم سے فارغ کردیا ہے۔
اس کے علاوہ بورڈ نے ہیڈ کوچ سرفراز احمد اور بولنگ کوچ عمر گل کو بھی ان کے عہدوں سے ہٹا دیا ہے۔
ذرائع کے مطابق پی سی بی کی جانب سے قومی ٹیم کی کارکردگی، سلیکشن پالیسی اور ٹیم مینجمنٹ کا مزید جائزہ لیا جا رہا ہے، جبکہ آنے والے دنوں میں مزید اہم فیصلے متوقع ہیں۔
About the Author
