بجلی صارفین کے لیے ریلیف ختم ہونے کا امکان، آئندہ ماہ نرخ بڑھنے کا خدشہ
اسلام آباد: کراچی سمیت ملک بھر کے بجلی صارفین کو ملنے والا سہ ماہی ریلیف رواں ماہ ختم ہونے جا رہا ہے، جس کے بعد اگلے ماہ بجلی کے نرخوں میں اضافے کا امکان ظاہر کیا جا رہا ہے۔
ذرائع کے مطابق بجلی کی قیمت میں فی یونٹ ایک روپے 99 پیسے کی کمی کی صورت میں دیا جانے والا سہ ماہی ایڈجسٹمنٹ ریلیف اگست میں اپنی مدت مکمل کر لے گا۔ یہ رعایت جون 2026 سے نافذ تھی، جس کے تحت صارفین کو مجموعی طور پر 67 ارب 17 کروڑ روپے سے زائد کا ریلیف فراہم کیا گیا۔
رپورٹس کے مطابق موجودہ ریلیف ختم ہونے کے بعد اپریل سے جون 2026 کی سہ ماہی ایڈجسٹمنٹ اگلے ماہ سے صارفین کے بجلی بلوں میں شامل کیے جانے کا امکان ہے۔ اس اقدام کے نتیجے میں بجلی کے نرخ ایک بار پھر بڑھ سکتے ہیں۔
ذرائع کے مطابق بجلی کی تقسیم کار کمپنیوں نے سہ ماہی ایڈجسٹمنٹ کے حوالے سے نیشنل الیکٹرک پاور ریگولیٹری اتھارٹی (نیپرا) میں درخواست بھی جمع کرا دی ہے۔
درخواست میں صارفین پر 23 ارب روپے سے زائد کا اضافی مالی بوجھ منتقل کرنے کی تجویز دی گئی ہے، جو اوسطاً تقریباً ایک روپے فی یونٹ بنتا ہے۔
تاہم بجلی کی قیمت میں اضافے سے متعلق حتمی فیصلہ نیپرا کی جانب سے درخواست کا جائزہ لینے اور متعلقہ فریقین کا مؤقف سننے کے بعد کیا جائے گا۔
About the Author
