وزیراعظم شہباز شریف کی سعودی ایئرپورٹس پر حملوں کی مذمت، سعودی عرب سے یکجہتی کا اظہار

اسلام آباد: پاکستان سعودی عرب کی سلامتی اور خودمختاری کے تحفظ کے لیے پرعزم ہے، وزیراعظم

وزیراعظم شہباز شریف نے سعودی عرب کے ریاض اور ابہا ایئرپورٹس پر حوثی ملیشیا کے حملوں کی شدید مذمت کرتے ہوئے سعودی قیادت اور عوام کے ساتھ پاکستان کی مکمل یکجہتی کا اعادہ کیا ہے۔

سماجی رابطے کی ویب سائٹ ایکس پر اپنے بیان میں وزیراعظم نے کہا کہ سعودی عرب پر بار بار ہونے والے حملوں کے نتیجے میں شہریوں کی جانیں ضائع ہوئیں اور متعدد افراد زخمی ہوئے، جو انتہائی افسوس ناک ہے۔

شہباز شریف نے بیلسٹک میزائلوں کو فضا میں تباہ کرنے پر سعودی مسلح افواج اور اتحادی فورسز کی پیشہ ورانہ صلاحیتوں اور بروقت کارروائی کو سراہا۔ انہوں نے کہا کہ شہریوں کی حفاظت اور مملکت کی سلامتی یقینی بنانے کے لیے کیے جانے والے اقدامات قابل تحسین ہیں۔

وزیراعظم نے واضح کیا کہ پاکستان اپنے برادر ملک سعودی عرب کے ساتھ مضبوط تعلقات اور غیر متزلزل یکجہتی برقرار رکھے گا۔ ان کے مطابق مکہ مشترکہ دفاعی معاہدے اور اسٹریٹجک سیاسی و دفاعی کمیٹی کے فیصلوں کی روشنی میں سعودی عرب کی خودمختاری، علاقائی سالمیت اور سلامتی کے تحفظ کے لیے پاکستان کا عزم قائم ہے۔

انہوں نے سعودی عرب کے اپنے شہریوں، شہروں اور اہم تنصیبات کے دفاع کے حق کی حمایت کرتے ہوئے حوثی ملیشیا پر زور دیا کہ وہ حملے فوری طور پر بند کرے۔ وزیراعظم کا کہنا تھا کہ پاکستان ان خطرات سے نمٹنے میں سعودی عرب کے ساتھ کھڑا رہے گا۔