مشرقِ وسطیٰ میں فوجی کارروائیوں کے بجائے مذاکرات کو موقع دیا جائے، چین کا مطالبہ

بیجنگ: چین نے مشرقِ وسطیٰ میں جاری کشیدگی کے خاتمے کے لیے تمام متعلقہ فریقوں کو مذاکرات کی میز پر واپس آنے اور سیاسی حل تلاش کرنے کا مشورہ دیا ہے۔

چینی وزیر خارجہ وانگ یی نے بیجنگ میں ایران کی سپریم نیشنل سکیورٹی کونسل کے نائب سیکریٹری علی باقری کنی سے ملاقات کے دوران خطے کی صورتحال پر تبادلہ خیال کیا۔

چینی خبر رساں ادارے شنہوا کے مطابق وانگ یی نے کہا کہ مشرقِ وسطیٰ کے تنازعات کا مستقل حل فوجی طاقت کے بجائے بات چیت اور سفارتی کوششوں میں پوشیدہ ہے۔

انہوں نے تمام فریقوں پر زور دیا کہ وہ مزید عسکری اقدامات سے گریز کریں اور اختلافات کو مذاکرات کے ذریعے حل کرنے کی کوشش کریں۔

ملاقات میں چینی وزیر خارجہ نے ایران کی خودمختاری اور قومی سلامتی کے تحفظ کے لیے بیجنگ کی حمایت کا اعادہ بھی کیا۔

یہ بیان ایسے وقت میں سامنے آیا ہے جب خطے میں جنگ بندی اور کشیدگی کم کرنے کے لیے مختلف ممالک کی جانب سے سفارتی رابطے جاری ہیں۔