ترکیہ کا باشیقہ فوجی کیمپ عراق کے حوالے کرنے پر اتفاق

بغداد: ترکیہ اور عراق کے درمیان ہونے والے حالیہ معاہدے کے تحت ترکیہ نے شمالی عراق میں موصل کے قریب واقع باشیقہ-زلیکان فوجی کیمپ عراقی حکومت کے حوالے کرنے پر اتفاق کیا ہے۔

معاہدے کے مطابق ترکیہ اپنی فوجی موجودگی کو مرحلہ وار کم کرتے ہوئے کیمپ کا کنٹرول عراقی وفاقی حکومت کو منتقل کرے گا۔

یہ عمل دونوں ممالک کے درمیان طے پانے والے باہمی طریقہ کار کے تحت مکمل کیا جائے گا۔

ترکیہ اور عراق نے اس اقدام کو دونوں ملکوں کے درمیان سیکیورٹی تعاون بہتر بنانے اور خطے میں کشیدگی کم کرنے کی کوششوں کا حصہ قرار دیا ہے۔

معاہدے کا ایک مقصد عراق میں ریاستی اداروں کی عمل داری کو مزید مستحکم کرنا بھی بتایا گیا ہے۔

باشیقہ کیمپ کی حوالگی کے ساتھ دونوں ممالک نے سنجار کی سیکیورٹی صورتحال اور سرحدی تحفظ سمیت دیگر سیکیورٹی معاملات میں تعاون بڑھانے پر بھی اتفاق کیا ہے۔

حکام کے مطابق یہ پیش رفت ترکیہ اور عراق کے درمیان سیکیورٹی معاملات کو باہمی مشاورت اور سفارتی طریقہ کار کے ذریعے آگے بڑھانے کی کوششوں کا حصہ ہے۔