یمن: حوثیوں کا مغربی ساحل پر 14 بیلسٹک میزائل اور ڈرون حملوں کا دعویٰ

صنعا: حوثی جنگجوؤں نے یمن کے مغربی ساحل کے آبادی والے علاقوں میں 14 بیلسٹک میزائل اور ڈرون حملے کرنے کا دعویٰ کیا ہے۔

ترک نشریاتی ادارے ٹی آر ٹی کے مطابق یمنی مسلح افواج کے میڈیا سینٹر نے ایک فوجی ذریعے کے حوالے سے بتایا کہ طائز کے محاذ پر فضائی دفاعی نظام نے متعدد ڈرونز کو روک لیا، جبکہ مغربی ساحل کے مختلف علاقوں میں بھی بعض ڈرونز کو فضا میں ہی ناکام بنایا گیا۔

فوجی ذریعے کے مطابق حوثیوں کی جانب سے داغے گئے بیلسٹک میزائل مغربی ساحل پر تعینات فوجی دستوں کے ٹھکانوں کو نشانہ بنانے میں کامیاب نہیں ہوئے۔

رپورٹ کے مطابق حملوں کے نتیجے میں کسی ممکنہ جانی یا مالی نقصان کی تفصیلات تاحال سامنے نہیں آئی ہیں۔

یہ حملے ایسے وقت میں کیے جانے کا دعویٰ کیا گیا ہے جب یمن کے مغربی ساحل اور بحیرۂ احمر کے اطراف سکیورٹی صورتحال بدستور کشیدہ ہے۔ خطے میں میزائل اور ڈرون حملوں کے باعث بحری و تجارتی سرگرمیوں کو بھی خطرات کا سامنا ہے۔