اسلام آباد: رواں مالی سال 2026-27 کے تیسرے ماہ ستمبر 2026 کے پہلے ہفتے کے دوران ملک میں مہنگائی کی شرح میں ایک بار پھر اضافہ ریکارڈ کیا گیا ہے۔
وفاقی ادارہ شماریات کی ہفتہ وار رپورٹ کے مطابق حالیہ ہفتے مہنگائی میں 0.65 فیصد اضافہ ہوا، جبکہ سالانہ بنیادوں پر مہنگائی کی شرح 8.32 فیصد رہی۔
رپورٹ کے مطابق ایک ہفتے کے دوران 17 اشیائے ضروریہ مہنگی، 7 اشیا سستی ہوئیں، جبکہ 27 اشیا کی قیمتوں میں کوئی تبدیلی نہیں آئی۔
اعداد و شمار کے مطابق حالیہ ہفتے پیاز کی قیمت میں 26.30 فیصد کا نمایاں اضافہ ہوا۔ چکن 0.85 فیصد، آلو 0.96 فیصد، لہسن 0.18 فیصد، سرسوں کا تیل 0.13 فیصد، دال ماش 0.67 فیصد، پٹرول 0.90 فیصد، ہائی اسپیڈ ڈیزل 0.09 فیصد جبکہ آٹے کی قیمت میں 0.88 فیصد اضافہ ریکارڈ کیا گیا۔
دوسری جانب کچھ اشیائے ضروریہ کی قیمتوں میں کمی بھی ہوئی۔ رپورٹ کے مطابق کیلے کی قیمت میں 2.54 فیصد، دال مونگ 0.69 فیصد، دال چنا 0.60 فیصد، انڈے 0.11 فیصد، چینی 0.18 فیصد جبکہ گڑ کی قیمت میں 0.05 فیصد کمی ریکارڈ کی گئی۔
اعداد و شمار کے مطابق مجموعی طور پر مہنگائی کا دباؤ برقرار ہے، جس کے باعث عام شہریوں کے روزمرہ اخراجات میں مزید اضافہ ہوا ہے۔
About the Author
