وزارت خارجہ کا دستاویزات کی تصدیق کے لیے ڈیجیٹل نظام فعال، ای سرٹیفکیٹ گھر بیٹھے حاصل کرنے کی سہولت

اسلام آباد: وزارت خارجہ نے دستاویزات کی تصدیق کے عمل کو آسان بنانے کے لیے ڈیجیٹل اٹیسٹیشن سسٹم فعال کر دیا ہے، جس کے ذریعے شہری آن لائن درخواست جمع کرا سکیں گے اور تصدیق مکمل ہونے پر ای سرٹیفکیٹ ای میل کے ذریعے حاصل کر سکیں گے۔

وزارت خارجہ کے مطابق یہ نظام ۱۲ اکتوبر ۲۰۲۶ سے کام کر رہا ہے۔ اس سہولت کے تحت اسلام آباد میں مرکزی دفتر کے علاوہ لاہور، کراچی، پشاور، کوئٹہ اور گجرات کے لائژن دفاتر سے متعلقہ دستاویزات کی تصدیق بھی کروائی جا سکے گی۔

نئے نظام کے تحت درخواست دہندگان جنرل اور اپوسٹل اٹیسٹیشن کے لیے آن لائن کارروائی مکمل کرکے مقررہ فیس ادا کریں گے، جس کے بعد تصدیقی سرٹیفکیٹ ای میل کے ذریعے فراہم کیا جائے گا۔ وزارت خارجہ کے مطابق یہ نظام ہائر ایجوکیشن کمیشن (ایچ ای سی) کے طریقہ کار کو مدنظر رکھتے ہوئے تیار کیا گیا ہے۔

اس اقدام کا مقصد تصدیق کے عمل کو تیز، آسان اور شفاف بنانا ہے تاکہ شہریوں کو بار بار دفاتر کے چکر نہ لگانے پڑیں اور ان کے وقت اور اخراجات کی بچت ہو۔ تاہم بعض مخصوص اور استثنائی معاملات میں درخواست دہندگان کو ذاتی طور پر حاضر ہونا پڑ سکتا ہے۔

وزارت خارجہ نے بتایا ہے کہ دستاویزات کی تصدیق کے خواہش مند افراد سرکاری آن لائن پورٹل کے ذریعے اپنی درخواستیں جمع کرا سکتے ہیں۔