کراچی: کراچی سمیت ملک بھر کے بجلی صارفین کے لیے آئندہ تین ماہ کے دوران بجلی مزید مہنگی ہونے کا امکان ہے۔ سہ ماہی ایڈجسٹمنٹ کے تحت فی یونٹ بجلی کی قیمت میں ہر ماہ ایک روپے 34 پیسے اضافے کی تجویز زیرِ غور ہے۔
نیشنل الیکٹرک پاور ریگولیٹری اتھارٹی (نیپرا) نے بجلی کی تقسیم کار کمپنیوں کی جانب سے دائر درخواست پر سماعت مکمل کرنے کے بعد فیصلہ محفوظ کرلیا ہے۔
نیپرا حکام درخواست میں شامل اعداد و شمار اور متعلقہ ریکارڈ کا جائزہ لینے کے بعد حتمی فیصلہ جاری کریں گے۔ حتمی منظوری کے بعد ہی اضافے کی اصل شرح اور اس کے اطلاق سے متعلق صورتحال واضح ہوگی۔
ذرائع کے مطابق اگر مجوزہ اضافے کی منظوری دے دی جاتی ہے تو بجلی صارفین پر مجموعی طور پر تقریباً 34 ارب روپے کا اضافی مالی بوجھ پڑ سکتا ہے۔
سہ ماہی ایڈجسٹمنٹ کے تحت ممکنہ اضافے کا اثر ملک بھر کے بجلی صارفین کے ماہانہ بلوں پر پڑے گا، تاہم حتمی رقم اور اطلاق کا فیصلہ نیپرا کی جانب سے جاری کیے جانے والے فیصلے کے بعد سامنے آئے گا۔
بجلی کی قیمتوں میں ممکنہ اضافے سے پہلے ہی مہنگائی اور بلند بجلی بلوں کا سامنا کرنے والے صارفین پر مزید مالی دباؤ آنے کا امکان ہے
About the Author
