مقبوضہ مغربی کنارے میں اسرائیلی فورسز کی کارروائیاں، صحافی سمیت 21 فلسطینی گرفتار

مقبوضہ مغربی کنارہ: اسرائیلی فورسز نے جمعرات کی صبح مقبوضہ مغربی کنارے کے مختلف علاقوں میں چھاپہ مار کارروائیاں کرتے ہوئے ایک صحافی سمیت 21 فلسطینیوں کو گرفتار کرلیا۔

میڈیا رپورٹس کے مطابق گرفتار ہونے والوں میں بیت لحم سے 7، نابلس سے 9، سلفیت سے 4 جبکہ ہیبرون سے ایک صحافی شامل ہے۔

بیت لحم میں اسرائیلی فورسز نے الدوحہ قصبے، دھیشیہ پناہ گزین کیمپ اور الفوغرہ کے نواحی علاقوں میں مختلف گھروں پر چھاپے مار کر 4 فلسطینیوں کو گرفتار کیا۔

رپورٹ کے مطابق بیت فجر قصبے میں بھی کارروائی کی گئی، جہاں ایک گھر کی تلاشی اور مبینہ توڑ پھوڑ کے بعد ایک شخص اور اس کے دو بیٹوں کو حراست میں لے لیا گیا۔

نابلس میں اسرائیلی فورسز نے شہر کے جنوب میں واقع اسیرہ القبلیہ گاؤں سے دو فلسطینیوں کو گرفتار کیا، جبکہ عسکر پناہ گزین کیمپ سے بھی ایک شخص کو حراست میں لیا گیا۔

اسی طرح عوارتا قصبے سے 3، بازاریہ سے 2 اور نابلس شہر کی عمان اسٹریٹ سے ایک فلسطینی کو گرفتار کیا گیا۔

نابلس کے شمال مغرب میں واقع سیبسٹیا قصبے میں بھی کارروائی کی گئی، جہاں ایک فلسطینی قیدی کی والدہ اور بہن کو حراست میں لے کر فیلڈ میں پوچھ گچھ کی گئی، تاہم بعد ازاں دونوں کو رہا کردیا گیا۔

سلفیت صوبے میں اسرائیلی فوج نے قراوت بنی حسن قصبے میں گھروں پر چھاپے مار کر 4 فلسطینیوں کو گرفتار کیا۔ رپورٹ کے مطابق کارروائی کے دوران گھروں سے سامان بھی لے جایا گیا جبکہ ایک گرفتار شخص کی گاڑی بھی قبضے میں لے لی گئی۔

دوسری جانب ہیبرون صوبے میں اسرائیلی فورسز نے شہر کے مغرب میں واقع ادنہ قصبے سے ایک صحافی کو گرفتار کیا۔

مختلف علاقوں میں ہونے والی ان کارروائیوں کے دوران گرفتار کیے گئے فلسطینیوں کے خلاف الزامات یا ان کی موجودہ قانونی حیثیت کے بارے میں مزید تفصیلات سامنے نہیں آسکیں۔