اقوام متحدہ کا پاکستان سے رابطہ

اقوام متحدہ نے امریکا ایران جنگ کے خاتمے کے لیے پاکستان سے رابطے کی تصدیق کردی

نیویارک: اقوام متحدہ نے امریکا اور ایران کے درمیان جاری جنگ کے خاتمے اور سفارتی کوششوں کے سلسلے میں پاکستان سے رابطے کی تصدیق کردی ہے۔

اقوام متحدہ کے سیکریٹری جنرل انتونیو گوتریس کے ترجمان اسٹیفن دوجارک نے بتایا کہ اس معاملے پر پاکستانی حکام سے رابطہ کیا گیا ہے۔ انہوں نے جون میں امریکا اور ایران کے درمیان اسلام آباد میں ہونے والے مفاہمتی معاہدے میں پاکستان کے کردار کو بھی سراہا۔

اقوام متحدہ کے ترجمان کے مطابق پاکستان سمیت خطے کے دیگر ممالک نے اس سے قبل مذاکراتی عمل میں اپنا کردار ادا کیا تھا۔ ان کا کہنا تھا کہ امریکا اور ایران کے درمیان مذاکرات کی بحالی جنگ کے خاتمے کی جانب پیش رفت میں مددگار ثابت ہوسکتی ہے۔

اسٹیفن دوجارک نے فریقین پر زور دیا کہ تنازع کے حل کے لیے سفارت کاری اور مذاکرات کا راستہ اختیار کیا جائے۔ اقوام متحدہ کا مؤقف ہے کہ بحران کے پائیدار حل کے لیے بامعنی مذاکرات اور سفارتی کوششیں ضروری ہیں۔