کراچی: عالمی منڈی میں قیمتی دھاتوں کی قیمتوں میں اضافے کے اثرات مقامی صرافہ بازاروں پر بھی نمایاں رہے، جہاں سونے اور چاندی دونوں کی قیمتوں میں نمایاں اضافہ ریکارڈ کیا گیا۔
بین الاقوامی بلین مارکیٹ میں فی اونس سونے کی قیمت 51 ڈالر بڑھنے کے بعد 4 ہزار 319 ڈالر تک پہنچ گئی، جس کے نتیجے میں پاکستان میں بھی سونے کی قیمتوں میں تیزی دیکھی گئی۔
مقامی مارکیٹ میں فی تولہ سونا 5 ہزار 100 روپے مہنگا ہو کر 4 لاکھ 54 ہزار 336 روپے تک جا پہنچا، جبکہ 10 گرام سونے کی قیمت میں 4 ہزار 372 روپے اضافے کے بعد نئی قیمت 3 لاکھ 89 ہزار 519 روپے مقرر ہوئی۔
دوسری جانب عالمی مارکیٹ میں چاندی کی قیمت بھی 2 ڈالر 80 سینٹ اضافے کے ساتھ 64 ڈالر 60 سینٹ فی اونس تک پہنچ گئی۔
بین الاقوامی رجحان کے اثرات کے باعث مقامی صرافہ بازار میں فی تولہ چاندی 280 روپے مہنگی ہو کر 6 ہزار 939 روپے تک جا پہنچی، جبکہ 10 گرام چاندی کی قیمت 240 روپے اضافے کے بعد 5 ہزار 949 روپے ریکارڈ کی گئی۔
About the Author
