میرپور: آزاد جموں و کشمیر قانون ساز اسمبلی کے انتخابات کے پہلے مرحلے میں میرپور ڈویژن کے 13 حلقوں میں ووٹنگ کا عمل مکمل ہونے کے بعد غیرحتمی اور غیرسرکاری نتائج موصول ہونا شروع ہوگئے ہیں۔ چیف الیکشن کمشنر کی ہدایت پر پولنگ کا وقت شام 5 بجے کے بجائے ایک گھنٹہ بڑھا کر 6 بجے تک کر دیا گیا، جس کے بعد پولنگ ختم ہوتے ہی ووٹوں کی گنتی کا عمل شروع کیا گیا۔
ابتدائی نتائج کے مطابق حلقہ ایل اے 1 میرپور میں مسلم لیگ (ن) کے اظہر صادق کامیاب قرار پائے، جبکہ ایل اے 2 میرپور اور ایل اے 3 میرپور میں پاکستان پیپلز پارٹی کے امیدواروں نے کامیابی حاصل کی۔ ایل اے 4 میرپور میں مسلم لیگ (ن) نے دوبارہ نشست اپنے نام کر لی۔
بھمبر کے حلقوں میں بھی مسلم لیگ (ن) کو نمایاں برتری حاصل رہی۔ ایل اے 7 بھمبر میں چوہدری طارق فاروق کامیاب قرار پائے، جبکہ ایل اے 5 اور ایل اے 6 میں بھی ن لیگ کے امیدوار غیرحتمی نتائج کے مطابق آگے رہے۔
کوٹلی ڈویژن میں ایل اے 8 پر پیپلز پارٹی کے ظفر اقبال ملک کامیاب ہوئے، جبکہ ایل اے 9، ایل اے 11، ایل اے 12 اور ایل اے 13 میں مسلم لیگ (ن) کے امیدواروں نے کامیابی حاصل کی۔ ایل اے 10 کوٹلی میں نتائج مکمل نہ ہونے تک پیپلز پارٹی کے امیدوار کو برتری حاصل تھی۔
دوسری جانب پنجاب کی سینئر وزیر اور مسلم لیگ (ن) کی رہنما مریم اورنگزیب نے سماجی رابطے کے پلیٹ فارم ایکس پر جاری اپنے بیان میں کہا کہ میرپور کے عوام نے مسلم لیگ (ن) کے حق میں اعتماد کا اظہار کیا ہے۔ ان کا کہنا تھا کہ اس سے قبل مظفرآباد کے عوام بھی اپنا فیصلہ دے چکے ہیں اور آئندہ مرحلے میں بھی پارٹی کی کامیابی کی امید ہے۔
غیرسرکاری اطلاعات کے مطابق اس مرتبہ ووٹنگ کی مجموعی شرح گزشتہ انتخابات کے مقابلے میں کم رہی اور نسبتاً کم تعداد میں ووٹرز نے اپنا حقِ رائے دہی استعمال کیا۔
ابتدائی نتائج کے مطابق میرپور ڈویژن میں مسلم لیگ (ن) کو واضح برتری حاصل ہوتی دکھائی دے رہی ہے، جبکہ پاکستان پیپلز پارٹی نے بھی متعدد حلقوں میں مضبوط مقابلہ کرتے ہوئے اہم نشستیں اپنے نام کی ہیں۔ حتمی سرکاری نتائج الیکشن کمیشن کی جانب سے جاری کیے جائیں گے۔
About the Author
