فیلڈ مارشل سے ناروے کے وزیر خارجہ کی ملاقات، دفاعی و سیکیورٹی تعاون بڑھانے پر اتفاق

راولپنڈی: ناروے کے وزیر خارجہ ایسپن بارتھ ایدے کی سربراہی میں اعلیٰ سطح کے وفد نے جی ایچ کیو راولپنڈی کا دورہ کیا، جہاں وفد نے فیلڈ مارشل سید عاصم منیر سے ملاقات کی۔

پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران باہمی دلچسپی کے امور، خطے کی سیکیورٹی صورتحال اور پاکستان و ناروے کے دوطرفہ تعلقات پر تفصیلی تبادلہ خیال کیا گیا۔

ملاقات میں دونوں ممالک کے درمیان مختلف شعبوں میں تعاون کو مزید فروغ دینے کے امکانات کا بھی جائزہ لیا گیا، جبکہ علاقائی اور عالمی سیکیورٹی صورتحال پر دونوں جانب سے نقطہ نظر کا تبادلہ کیا گیا۔

فیلڈ مارشل سید عاصم منیر نے عالمی امن اور علاقائی استحکام سے متعلق پاکستان کے مؤقف کو اجاگر کرتے ہوئے مشترکہ سیکیورٹی چیلنجز سے نمٹنے کے لیے باہمی تعاون اور اجتماعی کوششوں کی ضرورت پر زور دیا۔

آئی ایس پی آر کے مطابق ناروے کے وزیر خارجہ نے خطے میں امن و استحکام کے لیے پاک فوج کے پیشہ ورانہ کردار کو سراہا اور دونوں ممالک کے درمیان تعلقات مزید مضبوط بنانے کے عزم کا اظہار کیا۔

ملاقات کے دوران دفاع اور سیکیورٹی کے شعبوں میں دوطرفہ روابط اور تعاون کو مزید وسعت دینے پر بھی اتفاق کیا گیا۔

دونوں جانب سے اس عزم کا اظہار کیا گیا کہ پاکستان اور ناروے کے درمیان موجود دوطرفہ تعلقات کو باہمی مفاد اور مشترکہ تعاون کے ذریعے مزید مستحکم کیا جائے گا۔