اسلام آباد: وفاقی حکومت نے مسلح افواج سے تعلق رکھنے والے 9 افسران کو سول سروس میں شامل کرنے کی منظوری دے دی ہے۔ ان افسران کو پاکستان ایڈمنسٹریٹو سروس، پولیس سروس اور فارن سروس آف پاکستان میں شامل کیا جائے گا۔
دستیاب تفصیلات کے مطابق 9 افسران میں سے 5 کو پاکستان ایڈمنسٹریٹو سروس (PAS)، 2 کو پولیس سروس آف پاکستان (PSP) جبکہ 2 افسران کو فارن سروس آف پاکستان (FSP) میں شامل کرنے کی منظوری دی گئی ہے۔
فیڈرل پبلک سروس کمیشن کی جانب سے جاری اعلامیے میں بتایا گیا ہے کہ تینوں مسلح افواج سے تعلق رکھنے والے ان امیدواروں نے نفسیاتی اور زبانی امتحان کے مراحل کامیابی سے مکمل کیے، جس کے بعد انہیں سول سروس میں شمولیت کے لیے اہل قرار دیا گیا۔
حکومتی منظوری کے بعد مذکورہ افسران کو مقابلے کے امتحان 2025 کے تحت مختلف گروپس میں شامل کیا گیا ہے۔ پانچ افسران پاکستان ایڈمنسٹریٹو سروس، دو پولیس سروس اور دو فارن سروس کا حصہ بنیں گے۔
اس پیش رفت کے نتیجے میں مسلح افواج سے سول انتظامیہ، پولیس اور سفارتی شعبے میں افسران کی شمولیت کا عمل آگے بڑھا ہے۔ متعلقہ اداروں کی جانب سے جاری کردہ باضابطہ تفصیلات کے مطابق افسران کی انڈکشن مقررہ قواعد و ضوابط کے تحت عمل میں لائی گئی ہے۔
About the Author
